बिराटनगर – प्रहरी बनेर ठगी गर्ने एक युवक पक्राउ परेका छन्। जिल्ला सुनसरी इनरुवा नगरपालिका–६ का २२ वर्षीय विनोद दाहाललाई प्रहरीले पक्राउ गरी कानुनी कारबाही अगाडि बढाएको छ।
दाहालले लागुऔषध मुद्दामा म्याद थप भई हिरासतमा रहेका प्रतिवादी हेमन विश्वकर्मालाई मुद्दा मिलाइदिने भन्दै उनकी आमा लीला विश्वकर्मासँग २५,००० रुपैयाँ लिइसकेको र थप १५,००० रुपैयाँ माग गरिरहेको अवस्थामा पक्राउ परेका हुन्।
लीला विश्वकर्माले इलाका प्रहरी कार्यालय पकलीलाई जानकारी गराएपछि प्रहरीले अनुसन्धान थालेको थियो। प्रहरीले २०८१ माघ २६ गते दिउँसो १ बजे इटहरी उपमहानगरपालिका–१७, लायन्सचोकबाट दाहाललाई नगद रकम लिइरहेको अवस्थामा पक्राउ गरेको हो। उनलाई साथमा रहेको मोबाइलसहित नियन्त्रणमा लिइएको छ।
हाल सम्मानित जिल्ला अदालत, सुनसरीबाट ७ दिनको म्याद थप गरी अनुसन्धान भइरहेको जिल्ला प्रहरी कार्यालय सुनसरीले जनाएको छ।
