

विराटनगर । मोरङको रंगेली नगरपालिका–७, नीचामारीमा थलेश्रिङ गर्ने क्रममा आगलागी भएको छ। आगलागीबाट विनोद मण्डलको घर पूर्ण रूपमा जलेर नष्ट भएको छ। घरभित्र रहेका सबै सामान समेत आगोले खरानी बनाएको छ।
स्थानीय बासिन्दा, नगर प्रहरी, नेपाल प्रहरी र रंगेली नगरपालिकाको दमकलको सक्रियतामा आगो नियन्त्रणमा लिन सफल भएको छ। आगलागीका कारण अन्य घरहरू समेत जोखिममा परेका थिए तर समयमै नियन्त्रण गरिएकाले थप क्षति हुन पाएन।
यस घटनामा कुनै मानवीय क्षति नभएको बताइएको छ। तर आगलागीका कारण भएको आर्थिक क्षतिको विवरण भने अझै संकलन भइरहेको छ।