विराटनगर – संघीयता खारेज तथा पूर्वराजा ज्ञानेन्द्र शाहका लागि नारायणहिटी दरबार खाली गरिनुपर्ने मागसहित मोरङ र सुनसरीका राष्ट्रवादीहरूले विराटनगरमा शक्ति प्रदर्शन गरेका छन्। शनिबार मोटरसाइकल र्यालीसहित उनीहरूले सरकारलाई चेतावनी दिएका छन्।
राष्ट्रवादी समूहले संघीयता असफल भएको दाबी गर्दै यसको खारेजीको माग गरेका छन्। उनीहरूले वर्तमान राजनीतिक व्यवस्थाले देशलाई आर्थिक संकटमा पुर्याएको र राष्ट्रवाद कमजोर पारेको आरोप लगाउँदै राजसंस्थाको पुनर्स्थापनाको पक्षमा आवाज उठाएका छन्। र्यालीमा विभिन्न राष्ट्रवादी व्यक्तित्वहरूले सम्बोधन गरेका थिए, जसमा उनीहरूले नेपाललाई एकताबद्ध गर्न राजसंस्था आवश्यक रहेको बताएका छन्।
शक्ति प्रदर्शनका क्रममा सहभागीहरूले राष्ट्रिय झण्डा फहराउँदै राजसंस्थाको पक्षमा नाराबाजी गरेका थिए। उनीहरूले वर्तमान शासन प्रणालीले देशलाई अव्यवस्थित बनाएको भन्दै छिटोभन्दा छिटो वैकल्पिक व्यवस्था अपनाउन सरकारलाई दबाब दिएका छन्।
र्यालीमा सयौं मोटरसाइकलसहित राष्ट्रवादी कार्यकर्ताहरूको उल्लेखनीय सहभागिता रहेको थियो। उनीहरूले आगामी दिनमा अझ सशक्त आन्दोलन गर्ने चेतावनीसमेत दिएका छन्।
